جدي رماني في الشارع عشان كان مفكرني….2

ردت عليه بتساؤل واهتمام

:- بجد هو انت بتسمع اغاني اصلا والجو بتاع العشاق ده

مسك ايديها وبص في عينيها بتركيز شديد

:- انت لو اديتيني فرصه هخليكي تزهقي من عشقي ليكي

“وبدا ان هو يغني كوبليه صغير من الاغنيه اللي بيحبها”

:- كان في ولد ما لوش بلد غير عين حبيبته المخلصه فلاح وغاوي بيقول غناوي وبيلعب الخيل و العصا

…انتي انتي حبيبتي المخلصه

وفي مكان تاني كان قاعد بسرحان شديد وزاد فوق عمره 100 سنه

بسبب الكلام اللي سمعه

:- يعني انت دلوقتي معترف ان ليك بنت ومش عارف مكانها

رد عليه مصطفى بدموع

:- والله زي ما بقول لك كده انا لما سافرت عشان كان عندي شغل خارج مصر رجعت ما لقيتش بنتي في بيتي ومراتي دخلت في صدمه عصبيه من يوم الحادثه اللي حصلت لها

بص له عصام باستغراب وسالوا

:- حادثه؟؟حادثه ايه دي

:- لما رجعت لقيت والدي بيقول ان في ناس تبع المافيا كانوا متفقين مع شركات تانيه عشان يوقعونا وبيقول لي ان هم استغلوا عدم وجودي وبعتوا ناس خطفوا بنتي وقتلوها وتعدوا على مراتي بضرب لحد ما فقدت النطق كانت ساعات بتتكلم وتقول هو اللي اخذها بس لحد دلوقتي مش عارف هو مين ده اللي كانت بتقوله حاولت كتير ان انا ادور على بنتي لكن كانت فص ملح وداب وكل اللي انا فاكره ليها صوره اتبعتت لي وهي مرميه في الارض وسايحه في دمها انا كل ما اشوف الصوره دي بتحطم و ظهري بيتكسر 1000 مره حاولت كتير ابحث عنها لكن كانت اختفت انا بس كنت عاوز لو حتى جثتها على الاقل احطها في قبر واكون عارف ان لحمي ودمي موجود هنا

اتصدم عصام من كم الحقايق اللي عارفها واللي لو اتكشفت هتدمر ناس كثير واولهم الطفله اللي لقاها صدفه

:- ما قلتليش يا استاذ مصطفى موقف والدك كان ايه

:- انا ما كنتش عارف اذا كان هو فرحان او لا شكيت كثير ان هو اللي يكون عمل كده بس لحد الان مش متاكد والله حاسس ان هيجي يوم واشوف بنتي حتى قبل ما اموت حاسس ان هي عايشه

:- طب لو قلت لك بنتك فين وشفتها هتعرفها

بص له بعدم تصديق وصدمه

:- انت بتقول ايه انت عارف بنتي فين وانت تعرفها منين او تعرفني منين؟؟

كان بيسال بخوف على أمل هل بعد كل السنين ده هيلاقي بنته فعلا

رد عليه عصام بهدوء جدا بعد ما فهم الموضوع كان محتار يعرفه بمكان هيام ولا لا بس كل اللي كان عارفه ان لازم الاب و الام يعرفوا مكان بنتهم