ورا كل باب حكاية ج2 بقلم الكاتبة نرمين عادل همام

الجزء الثاني ورا كل باب حكاية للكاتبة نرمين عادل همام على الظهر، شيكو كان وصل لستتين كمان: جارة قديمة كانت كاتبة في مذكراتها عن صوت عيال بتصرخ جوه بيت . وصاحبة حضانة قالت إنها طردتها بعد ما لقت طفل متربط في سريره وقت القيلولة. الخيط واصل لورا بقاله سنين. لما ورّيت سلمى الملف، قعدت على تربيزة المطبخ تقرأ في سكات.. سكات مرعب. بعدها قالت: "كان فيه ولد." سكت ومستنيها تكمل. — "اسمه 'هاني'.. مامته كانت تعبانة وبات عندنا في الاجازة وأنا عندي 9 سنين. فاكرة صوته وهو بيعيط بالليل.. وتاني يوم الصبح كان وشه مزرق وعينه ورمة." إيدها اتكورت وبقت قبضة: "أمي قالت إنه وقع في الحمام. إنتي كنتي طفلة يا سلمى." — "سكتت.." — "كنتي بتحاولي تنجي بنفسك." بصت لي، وشفت نار الغضب بدأت تحرق ستارة الوجع اللي في عينيها. — "أنا مابقتش عايزة 'أنجو' منها.. أنا عايزة أنهي الكابوس ده." الساعة 3:30، "من القسم " وصلت. االاخصائية برتبه ملازم "دينا" دخلت بوش جامد، واضح إنها شافت بلاغات كذب كتير بين القرايب. كانت ذوق بس شاكة في كل كلمة. طلبت تقعد مع ليلى لوحدها. بعد نص ساعة، دينا طلعت من أوضة ليلى وهي عاضة على شفايفها ومنفعلة: — "أنا محتاجة أفتش 'أوضة المنور' (بيت الضيافة)." نورا فتحت الباب بابتسامة مكسورة ومصطنعة: — اتفضلي يا حبيبتي.. أنا مش فاهمة إيه الدراما اللي عيالي عاملينها دي!" دينا بدأت تدور.. الأوضة كانت مثالية. مفارش دانتيل، صور عائلية، سبحة ومصحف على التربيزة، وريحة بخور وفل. وفجأة دينا فتحت درج المطبخ.. وطلعت "معلقة خشب" كبيرة وتقيلة. وفي درج المكتب، لقت "مسطرة حديد" حوافها غامقة. وفي ضلفة الدولاب.. "حزام جلد". نورا ضحكت ببرود: "هي أدوات المطبخ بقت غير قانونية اليومين دول؟ " دينا رفعت المسطرة: "ليلى وصفت دي بالظبط." ابتسامة نورا اختفت في ثانية. — "العيال بيألفوا." سلمى دخلت الأوضة ووقفت قدامها: "والأمهات كمان بيكذبوا." نورا لفت لها بالراحة. سلمى كانت شاحبة، بس عينيها مابقتش بتهرب. — "حبستيني في الدواليب،" سلمى قالت بصوت ثابت، "ضربتيني في أماكن مبيشوفهاش حد.. قولت لي إن الوجع هو اللي بيخليني مؤدبة. خليتيني أخاف من تفكيري." نورا بصت لبنتها بجمود.. وبعدها قالت: — "بعد كل اللي ضحيت بيه عشانك.. ده رد الجميل؟" — "لا،" سلمى ردت، "ده مش رد جميل.. ده 'الفرامل' اللي هتوقفك عند حدك." لثانية، محدش اتنفس. وفجأة، نورا هجمت على سلمى بكل قوتها. وقفت في النص قبل ما تلمسها، ودينا طلبت البوليس فوراً. وش نورا اتشوه من الغل: "فاكرة إنك تقدري ترميني؟" فحيحها كان زي التعبان، "أنا اللي عملتك.. ومن غيري إنتي ولا حاجة." سلمى عينيها اتملت دموع، بس صوتها كان زي الصخر: — "من غيرك.. يمكن أخيراً أعرف أكون أنا." البوليس جه بعد 20 دقيقة. نورا بدأت "تمثل" دور الضحية ببراعة.. عيطت، هزت راسها، قالت ليلى مخدوعة وكريم بيحرضها، وسلمى أعصابها تعبانة. بس العسكري كان معاه تقرير الدكتورة مريم. والظابط صور الحاجات اللي لقتها دينا في الأوضة. — "يا نورا،" الظابط قال بحزم، "إنتي لازم تخلي المكان ده فوراً. فيه قرار منع اقتراب من الطفلة هيصدر دلوقت." دموع نورا نشفت في ثانية وبصت لنا ببرود مرعب: — "الحكاية دي مش هتطول.. سلمى هترجع لي زحف.. هي دايماً بتعمل كدة." سلمى مسكت إيد ليلى وضمتها: "مش المرة دي." وهي خارجة والبوليس معاها بشنطة هدوم واحدة، لفت وبصت لي: — "أنت هديت البيت ده." بصيت لإيد بنتي في إيد مراتي، وقولت لها: — "لا.. أنا لقيت اللي فاضل من البيت ده.. وبنظفه من الوساخة." الهجوم المضاد بتاع "نورا" بدأ بعد 48 ساعة بالظبط. المحامي بتاعها، "ممدوح سليمان"، كان من نوعية المحامين اللي بيلبسوا بدل غالية ويفصلوا القوانين على مقاسهم، ويبتسموا وكأن الحقيقة دي مجرد وجهة نظر. عمل مؤتمر صحفي قدام مكتبه، ووقف جنب نورا والكاميرات عمالة تنور وتصور. المحامي اتكلم بثقة وثعبانية: — "موكلتي.. هي أم وجدة فاضلة، تم انتزاعها من وسط عيلتها باتهامات باطلة، وتلاعب نفسي، وضغط من جوز بنتها اللي عنده تاريخ طويل في فبركة وتأليف القصص الدرامية عشان أفلامه الوثائقية." نورا كانت لابس فستان رمادي وقور وعقد اللولي، وبتطبطب على عينيها بمنديل ورق وبتمثل العياط: — "أنا عمري ما عملت حاجة غير إني أحب حفيدتي.. وده اللي بيحصل لما الناس بتخلط بين 'التربية الحمشة بتاعة زمان' وبين الأذى." سلمى كانت قاعدة على الكنبة بتتفرج على الفيديو وهي لامة نفسها ومستغربة الجبروت. — "ممثلة شاطرة،" قولت لها. سلمى ردت بمرارة: "دي خلّتني أشك في زرقان جسمي وأنا عيّلة.. طبعاً شاطرة." الليلة دي، فتحت برنامج المونتاج القديم بتاعي لأول مرة من سنين. كان معايا الفيديوهات بتاعة كاميرات المراقبة، التسجيلات الصوتية للمناقشات اللي حصلت بعد ما كشفناها، صور كدمات ليلى، تقرير الدكتورة مريم، وشهادة نجاة (عمتها) اللي سجلتها فيديو من إسكندرية، ومعاهم مذكرات الجارة القديمة وبلاغات حماية الطفل القديمة اللي شيكو جابهملي. أنا منشرتش فيديو "فضايح" ولا "انتقام".. أنا نشرت "حقائق". الفيلم القصير كان مدته 13 دقيقة و42 ثانية. سميته: "الوجه الآخر للطيبين". سلمى اتفرجت عليه قبل ما أنشره، ولما خلص، فضلت قاعدة ساكتة كتير. — "ده ممكن يأذي ليلى في المدرسة يا كريم؟" — "اسمها ووشها مستخبيين تماماً ومش باينين، ومحدش هيعرفها برة نطاق المحكمة.. إحنا بنحميها مش بنتاجر بيها." سلمى هزت راسها: "توكل على الله.. انشر." الفيديو نزل الساعة 8 بالليل. على الصبح، كان متبعت آلاف المرات.. وعلى آخر اليوم، القنوات الإخبارية والصفحات الكبيرة بدأت تتكلم عن الموضوع، وبقوا يكلموا شيكو عشان ياخدوا تفاصيل. الرأي العام اتقلب تماماً. "نورا" مابقتش الجدة الغلبانة اللي بتعيط.. بقت الست اللي وراها تاريخ أسود. الناس بدأت تتكلم وتظهر! بيبي سيتر قديمة افتكرت صريخ العيال في بيتها. ست كانت بتخدم مع أولادها في المسجد اعترفت إنها شافتها مرة بتجر عيل من ودنه وتدب صوابعها في جسمه لحد ما علّمت. ست تانية بعتت لي صور من دفتر قديم كانت كاتبة فيه تواريخ خروج العيال من بيت نورا زمان في المحافظة التانية وهم بيعيطوا ومتبهدلين. بعد تلات أيام، رئيسة النيابة، "المستشارة نجوى"، طلبتنا في مكتبها. ست عينيها حامية، شعرها فيه خصلات بيضا، ومابتطقش اللف والدوران. — "الحالة اللي قدامنا دي مش سوء تفاهم،" قالت بصرامة، "ده 'أسلوب حياة'.. أذى بدني، تحكم نفسي، تهديد، وتعتيم. حالة بنتكوا لسه طازة ومعانا تقرير طبي يقفل القضية، وشهادة مدام سلمى بتثبت التاريخ، والشهود الجداد بيثبتوا إن ده طبع فيها بقاله سنين." سلمى سألتها: "يعني القضية مضمونة يا فندم؟" المستشارة نجوى بصت لها: "أيوه.. بس محامي الدفاع هيقطع فيكم." قولت لها: "هم شغالين تقطيع من دلوقتي." — "هيقلو إنك محرض بنتك، وإن ذكريات سلمى قديمة ومش مظبوطة، وإنك بتستغل الوجع ده عشان تعمل شو وتكسب شهرة ليرجع اسمك كمخرج." سلمى بصت لي، وبعدين بصت للمستشارة وقالت بكلمة واحدة: "خليهم يجربوا." جلسة التجديد والمحاكمة الأولى كانت زحمة، والصحفيين واقفين برة. نورا جت ولابسة طرحة بيضا مكسورة، وشايلة في إيدها المصحف، وبتبتسم للكاميرات بحزن وكأنها بتدعي لنا بالهداية! بس جوة قاعة المحكمة.. القناع اتمزق. لما عمتها "نجاة" وقفت تشهد، المحامي ممدوح حاول يلمح إنها بتتبلى عليها عشان طمعانة في فلوس تعويض جوزها رجب اللي مات زمان. نجاة قربت من الميكروفون وقالت بصوت زلزل القاعة: — "أخويا مات في ظروف تشيب، وبنته اتهرت ضرب، وأنا اتهددت واتطردت برا العيلة وعشت بذنب إني منقذتش سلمى 30 سنة! أنا مش جاية عشان فلوس.. أنا جاية عشان الست دي مكانها السجن وماتقربش من عيل تاني طول ما فيها نفس!" ولما الدكتورة مريم شهدت، شرحت الكدمات بلغة علمية مشاعرتش: "أماكن مستخبية.. أوقات شفاء مختلفة.. علامات منتظمة.. ردود فعل رعب من الطفلة." وبعدها "دينا" بتاعة حماية الطفل شرحت كلام ليلى: — "البنت كانت مصدقة إنها هي اللي غلطانة وهي اللي تستاهل الضرب، ومقتنعة إنها لو اتكلمت مامتها مش هتحبها.. التلاعب النفسي ده أخطر من الضرب." نورا كانت قاعدة مابتتحركش، بس فكها كان كازز على بعضه لدرجة إن عروق رقبتها كانت باينة وبتترعش من الغل. رئيس المحكمة، "المستشار كريم"، كان بيسمع من غير أي تعبير، لحد ما محامي الدفاع قال إن موكلته ست مسنة وحنينة ودي مجرد "تربية شديدة". هنا القاضي قلع نظارته، وبص للمحامي وقال: — "يا أستاذ.. مفيش أي حنية في كف إيد بينزل على ضهر طفلة في حتة مستخبية عشان العلامات ماتظهرش وياريتها علامة واحدة كنا قولنا مرة وعدت ." القاعة كلها اتخرست. وفي آخر الجلسة، القاضي أمر بتحويل القضية للجنايات، ورفض الإفراج عنها بكفالة وأمر بحبسها احتياطياً على ذمة القضية خوفاً من تأثيرها على الشهود وخطورتها على الصغار. نورا وقفت فجأة لدرجة إن الكرسي اترزع في الأرض، وزعقت بعلو صوتها وهي بتشاور على سلمى: — "أنتم ميزيدش عليكم كدة! أنا ربيت بنتي أحسن تربية! من غيري إنتي ولا حاجة!" المستشار كريم بص لها بكل برود وقال: — "يا نورا.. هنا في المحكمة، التمثيل مش دليل." أمين الشرطة قرب منها وكلبش إيدها. وهي ماشية والبوليس ساحبها، لفت وبصت لسلمى بفحيح مرعب: — "هترجعيلي.. إنتي دايماً بترجعيلي!" سلمى مسكت إيدي وضغطت عليها، وهمست: — "لا يا نورا.. المرة دي مش هرجع." برة المحكمة، الصحفيين جيروا علينا والمايكات اتمدت، فقولت كلمة واحدة للكل: — "بنتي قالت الحقيقة، ومراتي واجهت الحقيقة. والنهاردة الثبت إن الأذى مبيستخباش ورا ألقاب العيلة، ولا ورا السبحة والمصحف، ولا ورا شكل البيوت النظيفة. العيال يستاهلوا الأمان، أكتر ما الكبار يستاهلوا المظاهر." الليل جه، وليلى كانت قاعدة في سريرها، وبصت لي وسألتني: — "بابا.. هي تيتا مشيت خلاص ومش هتيجي تاني أبداً؟" — "مش هتيجي هنا تاني يا روح بابا.. اطمني." ليلى فكرت شوية وهي بتمسح على دبدوبها، وبعدين بصت لي وقالت: — "بابا؟" — "نعم يا روح بابا؟" — "هو لو فيه حد بيقول إنه بيحبك، بس بيوجعك وبيأذيك.. يبقى ده حب؟" سلمى كتمت شهقتها وحطت إيدها على بوقها والدموع نزلت من عينيها. قعدت على السرير جنب ليلى وبصيت في عينيها وجاوبتها بكل حذر ودقة: — "لا يا حبيبتي.. ده مش حب. الحب الحقيقي هو اللي بيحسسك بالأمان ويحميكي." ليلى هزت راسها الصغير، وكأنها بتشيل الجملة دي وتخزنها في أعمق حتة جوه قلبها: — "يعني تيتا مكنتش بتحبنا صح؟" سلمى قربت منها وقالت بصوت ناعم ومكسور: "أيوه يا ليلى.. مكنتش بتعرف تحب صح." المحاكمة بدأت بعد تلات شهور في قاعة محكمة كانت ضيقة جداً ومشتسيعة لعدد الناس اللي جايين يشوفوا "نورا" وهي بتتحاسب على اللي عملته. الصحفيين ملو الدكك اللي ورا، وناس من جمعيات حماية الطفل واقفين في الطرقة برة. ناس غريبة مكنعيرفهاش بقوا يبعتوا جوابات على بيتنا.. ناس بتشكر ليلى على شجاعتها، وستات تانية بيبعتوا لسلمى يقولوا لها إنهم كمان اتربوا على إيد أمهات الكل كان بيحلف بأدبهم وطيبتهم في العلن، وبيشوفوا منهم الويل في السر. ليلى شهدت عن طريق "الفيديو كونفرانس" من أوضة تانية مقفولة، وكانت قاعدة وجنبها دكتورة نفسية متخصصة. كنت قاعد جوة القاعة عيني على الشاشة، وضامم إيديا بقوة لدرجة إن عقل صوابعي ابيضت من الشد والتوتر. المستشارة نجوى بدأت تسألها بأسئلة هادية وحنينة: — "ليلى.. حبيبتي، إنتي عارفة إحنا قاعدين هنا النهاردة ليه؟" ليلى هزت راسها: "عشان تيتا كانت بتوجعني." — "تقدري تقولي لنا إيه اللي حصل؟" ليلى بصت للدبدوب اللي في إيدها، وبعدين رفعت عينيها للشاشة: "لما كانت بتعملي الضفيرة، لو اتحركت كانت بتضربني في ضهري.. وتقولي البنات المؤدبات بيقعدوا ساكتين. وقالت لي لو قولت لماما، ماما هتعيط والذنب هيبقى ذنبي أنا." المحامي ممدوح سليمان حاول يدخل يستجوبها، وبدأ بصوت ناعم مصطنع عشان ميبانش شرير قدام المحكمة: — "ليلى يا حبيبتي.. هو بابا هو اللي قالك تقولي الكلام ده؟" ليلى كشرت وحواجبها اتعقدت ببراءة: "لا.. بابا قال لي قولي الحقيقة بس." — "طب هو بابا مكنش بيحب تيتا؟" — "بابا كان بيحب كل الناس.. لحد ما تيتا وجعتني." سمعت همهمة وحركة في القاعة.. كلام البنت صدم الكل. المحامي غير خطته وبدأ يخشن صوته شوية: "بس الأطفال ساعات بيفتكروا حاجات محصلتش، أو بيتهيأ لهم حاجات غلط." ليلى ضمت دبدوبها لـ صدرها وقالت كلمة واحدة قتلت الصمت في القاعة: — "أنا فاكراها صح.. عشان كانت بتوجع." الجملة دي وقعت زي الصاعقة.. المحامي مابقاش عارف ينطق. بعدها جه دور سلمى عشان تشهد.. عمرى في حياتي ما فخرت بحد زي ما فخرت بمراتي في اللحظة دي. وقفت قدام القضاة وهيئة ، وحكت لهم عن الدواليب، والأحزمة، والمعالق الخشب.. عن وقوفها في الزوايا بالساعات. عن الكلمات المسمومة اللي كانت بتسمعها كل يوم؛ إنها جاحطة، بتاعة دراما، مقصرة، وحشة، وأنها من غير أمها م تسواش قشرة بصلة. حكت لهم عن شعور إنك تكبر مع أم بتعمل صواني الأكل والشرب للجيران وتتبرع للجامعات الخيرية، وفي نفس الوقت بتنيم بنتها على البلاط. ممدوح سليمان حاول يكسرها ويهز ثقتها بنفسها: — "مدام سلمى.. مش حقيقي إنك بتتعالجي وبتاخدي مهدئات وأدوية قلق واكتئاب؟" — "أيوه، حقيقي." — "ومش أدوية القلق دي ممكن تأثر على الذاكرة وتخليكي تشوفي حاجات محصلتش؟" — "ممكن تأثر على الذاكرة.. بس مابتخلقش علامات وكدمات على الظهر." — "أنتي زعلانة من والدتك؟" سلمى لفت وشها وبصت لنورا في عينها مباشرة: "أيوه." — "يعني شهادتك دي نابعة من غل وانتقام شخصي؟" — "شهادتي نابعة من 'الحقيقة'." هنا، النيابة طلعت المفاجأة.. المستشارة نجوى شغلت تسجيل من التسجيلات اللي كنا مجهزينها. صوت نورا ملى القاعة وهو بيرن في الحيطان: — "العيال لازم يتكسر عينهم عشان يتربوا.. الوجع بيعلم اللي الكلام مبيعملوش!" شفت وشوش المستشارين والقضاة وهي بتتخشب من القرف والذهول. المحامي اعترض، والقاضي رفض الاعتراض وقال: "الطلب مرفوض.. التسجيل مقبول." بعدها ورا بعض.. شهدت نجاة، والجارة القديمة، وصاحبة الحضانة.. وحتى الأخصائية الاجتماعية القديمة اللي طلعت عالمعاش وقفت وقالت بأسف: "بلاغ سنة 1995 فشل عشان نورا كانت بتبان قدامنا ست رزينة، محترمة، وبتاعة ربنا.. مكنش يخطر على بالنا إنها بالخطورة دي." الأدلة والشهادات كانت بتتبني حوالين رقبة نورا زي السور.. مفيش مفر. في اليوم التاسع، نورا صممت تطلع على منصة الشهادة بنفسها، عكس نصيحة المحامي بتاعها. في الأول، عملت الوش اللي بتجيد تمثيله.. وش التضحية، الست اللي جوزها مات وسابها بدري، الست المؤمنة، التربية الصالحة، جيل الأيام دي اللي مبيعرفش الأصول والشدة. وعيطت وهي بتوصف إزاي "خسرت" بنتها سلمى. لحد ما المستشارة نجوى وقفت قدامها، وبصت لها بعيون زي الصقر، وبدأت الأسئلة اللي بجد: — "يا ست نورا.. هل عمرك مديتي إيدك أو ضربتي الطفلة ليلى كريم؟" نورا رفعت راسها بكل جبروت وقالت بثبات: — "لا.. محصلش." — "وهل عمرك ضربتي سلمى بنتك وهي طفلة؟" — "أنا كنت بربي بنتي وأدبها." — "بالحزام؟" — "كنت بستخدم الأسلوب المناسب." — "بالمعالق الخشب؟" — "لو كانت محتاجة لتقويم سلوك، أيوه." — "بالمساطر الحديد؟" شفايف نورا ضاقت واتحولت لخط رفيع من الغل: — "عيال اليومين دول بقوا مفسدين ودلعهم باخ عشان أهاليهم ضعاف ومبيعرفوش يربوا." — "وهل قولتي لليلى إن أمها هتبطل تحبها لو اتكلمت وقالت الحقيقة؟" — "لا." هنا المستشارة نجوى داست على ريموت في إيدها.. صوت نورا ملى سماعات القاعة من الليلة اللي جات فيها على باب بيتنا وهي بتزعق: — "البت الشقية دي قالت لكم إيه؟" نورا وشها جاب ألوان واصَّفر. المستشارة نجوى وقفت الصوت مؤقتاً: — "هو ده صوتك؟" نورا سكتت. — "يا ست نورا.. ده صوتك؟" زعقت بعصبية: "أيوه صوته.. بس أنتم بتلووا الكلام وبتغيروا معناه!" المستشارة نجوى قربت منها خطوة: — "يعني إنتي بتوصفي طفلة عندها 6 سنين، مجني عليها ومضروبة، بأنها 'بت شقية'؟" — "كانوا بيقوّوها عليا وبيقلبوا عليا بنتي!" — "بأنها تقول الحقيقة؟" — "بأن أبوها الضعيف بيدلعها ويبوظها!" والقضاة كانوا بيبصوا لها بتركيز شديد وريشة مكنتش تقف على وشوشهم. المستشارة نجوى وطت صوتها وبقت تسألها ببرود قاتل: — "هو إنتي بتعتقدي إن الأطفال لازم يخافوا من الكبار عشان يحترموهم؟" وش نورا احمر وعروقها برزت: — "أنا بعتقد إن الأطفال لازم 'يطيعوا والأمر يتنفذ'!" — "وبتأمني إن الوجع والألم وسيلة تعليمية مقبولة؟" — "لو الكلام منفعش.. أيوه!" سلمى ضغطت على إيدي جامد لدرجة إنها وجعتني. المستشارة نجوى سألتها سؤالها الأخير: "هو إنتي شايفة إنك عملتي أي حاجة غلط؟" نورا بصت ناحية المستشارين ، ولثانية واحدة افتكرت إنها هترجع تلبس قناع الغلب والتقوى تاني.. بس الغل والغرور عموها، ونار الغضب جواها كسبت: — "أنا حميت العيال دي من إنهم يطلعوا مالهمش عازة في الدنيا! سلمى بقت ممرضة ناجحة عشان أنا كسرت دماغها الناشفة وعلمتها الأدب! وليلى كانت هتعرف يعني إيه احترام للأكبر منها لو أبوها مكنش دخل في اللي ملوش فيه! أنا عملت اللي الأمهات الصالحين بيعملوه بقالهم أجيال!" تابع للجزء الثالث والاخير